ХАЙРЫН ӨРГӨӨ

Насанд минь ховорхон тохиох
Нарны галтай тулган дээр
Мянган дэлбээт цэцгийн шүүдэртэй
Мөнхийн усаар цайгаа чаналаа
Зүүдэнд минь ойрхон тэнгэрийн өргөө
Зүрхэнд минь дулаахан хайрын өргөө
Түмэн олныг хоймортоо багтаасан
Төгс гэгээрсэн багшийн минь өргөө
Галын илчинд бодлоос ундарсан
Газрын шимээр дэлхий дүүрлээ
Бурхан тэнгэрт хүслээ шившээд
Бүхнээс түрүүнд дээжээ өргөлөө.
Зүүдэнд минь ойрхон тэнгэрийн өргөө
Зүрхэнд минь дулаахан хайрын өргөө
Түмэн олныг хоймортоо багтаасан
Төгс гэгээрсэн багшийн минь өргөө
Алгаа дэлгэж хоймороо уриад
Амсар бялхуулан хайраа дүүргэж
Хатан ээжийнхээ буян хишгийг
Хамаг амьтанд тэнцүүхэн хүртээлээ
Зүүдэнд минь ойрхон тэнгэрийн өргөө
Зүрхэнд минь дулаахан хайрын өргөө
Түмэн олныг хоймортоо багтаасан
Төгс гэгээрсэн багшийн минь өргөө

Авшигтан Д. Бямбацогт